संघीय फोरम, न खुशी मनाएर न गम

जनकपुरधाम, ३ असोज ।  संघीय समाजवादी फोरमले संविधान दिवसको अवसरमा नखुशी मनाएको छ नत गम । मधेशी जनताको अधिकारको लागि लड्दै आएको संघीय फोरमले संविधान जारी भएपश्चात् यो संविधान विभेदकारी रहेको भन्दै पुर्नलेखनको माँग गरेको थिए । तर सोही संविधान अनुसार निर्वाचनमा गएपछि संविधान जारी भएको तेस्रो वर्षमा पार्टी भित्र विवादित बनेको छ ।
पार्टीकी केन्द्रिय उपाध्यक्ष रेणुकुमारी यादवले विभेदकारी संविधान संशोधन नहुञ्जेलसम्म आफूहरु असोज ३ गतेलाई कालो दिनकै रुपमा मनाउने प्रेस विज्ञप्ति समेत जारी गरेका थिए । उपाध्यक्ष यादवले प्रेस विज्ञप्ति जारी गरेको भोलिपल्ट नै पार्टी अध्यक्ष उपेन्द्र यादवले अहिले कालो दिवस मनाउने अवसर नआएको भन्दै कालो दिवस नमाउनका लागि पार्टीका नेता तथा कार्यकर्ताहरुलाई निर्देशन दिएका थिए ।
पार्टीको निर्देशन वावजूद पनि समाजिक सञ्जाल फेसबुकमा कालोपटी र कालो झण्डासहित आफ्नो फोटो समेत राख्दै उपाध्यक्ष यादवले लेखेकी छन, ‘विभेदकारी संविधान संशोधन नहुञ्जेलसम्म असोज ३ लाई कालो दिनको रुपमा मनाउने ।’
तर अध्यक्ष उपेन्द्र यादवले मंगलबार राजविराजमा कालो दिन नमनाउन निर्देशन दिएपछि उपेन्द्र सहभागी कार्यक्रममै रेणुले भनेकी थिइन, ‘अध्यक्षजी जनविश्वास र कार्यकर्ताको विश्वासमा खरो उत्रनुस् नभए जनताले साथ छोड्न सक्छन्।’
‘फोरम नेपाल सरकारमा गएको तीन महिना भयो, खै भयो त संशोधन ?’ रेणुले भनिन्, ‘फोरम नेपाल झण्डा र गाडीका लागि सरकारमा गएको होइन्, दुईतिहाई र्पुयाएर संविधान संशोधन गर्न सरकारमा गएको हो तर संशोधनको सिन्को भाँचिएको छैन्।’
तर असोज ३ गते जनकपुरधाम लगायत कही कतै उनीहरुले नखुशी मनाएका छन र नत गम नै सर्वसाधारण जनता समक्ष प्रस्तुत गरेका छन् ।