जनकपुरधाम, १५ साउन । प्रमुख प्रतिपक्षी दल काँग्रेसले सरकारका काम कारवाहीको विरोधमा देशका ७७ वटै जिल्लामा प्रदर्शन गरेका छन् ।
नेपाली काँग्रेस धनुषाले जनकपुर स्थित पार्टी कार्यालयबाट जम्मा भई निकालिएको जुलुस नगरपक्रियमा गर्दै रामानन्द चौकमा आएर कोणसभामा परिणत भएका छन् ।
काँग्रेस धनुषाका सभापति महाशंकर गिरीको नेतृत्वमा निकालिएको सो जुलुसमा उल्लेख्य रुपमा नेता तथा कार्यकर्ताहरुको सहभागिता रहेको थियो ।
कोणसभालाई सम्बोधन गर्दै केन्द्रिय सदस्य आनन्द ढुगानाले यो सरकार निकम्मा सरकार रहेको बताएका छन् । उनले कम्युनिष्ट सरकार निरंकुश लाद्न खोजेकोले नेपाली जनता चुप लागेर नबस्ने चेतावनी समेत दिएका छन् ।
त्यस्तै अर्को केन्द्रिय सदस्य एवं पूर्व मन्त्री महेन्द्र यादवले जबसम्म बढाएको कर फिर्ता र महंगी नियन्त्रण लिंदै नेपाली काँग्रेस आन्दोलन जारी राख्ने चेतावनी दिएका छन् । उनले नेपाली काँग्रेस अब सडकमा आई सकेको भन्दै पाँच वर्षसम्म यो सरकार टिक्न नसक्ने चेतावनी दिएका छन् ।
कोणसभामा पूर्व मन्त्री रामकृष्ण यादव, प्रदेश नं. २ का साँसद रामसरोज यादव लगायत दर्जनौं व्यक्तिले सरकार विरुद्ध खनिएका थिए ।
त्यस्तै सरकार सर्वसत्तावादतर्फ उन्मुख भएको भन्दै काङ्ग्रेसले सडक र सदन दुवैतर्फबाट आन्दोलन चर्काउने पूर्वघोषणा गरेअनुरुप मंगलबार ७७ वटै जिल्लामा विरोध प्रदर्शन गरेको हो ।
गत साउन १ गते पदाधिकारी बैठक बसेर काङ्ग्रेसले साउन १५ सम्मका लागि आन्दोलनका कार्यक्रम घोषणा गरेको थियो । साउन ३, ५ र ८ गते काङ्ग्रेसका भातृ संगठनको अगुवाईमा माइतीघर र बानेश्वरमा भएका विरोध प्रदर्शनमा डा.गोविन्द केसीका माग प्राथमिकतामा थियो ।
डा.गोविन्द केसी र सरकारबीच सहमतिपछि काङ्ग्रेसले आफ्नो आन्दोलन अन्य विषयमा केन्द्रीत गरेको थियो । पहिलो चरण अन्र्तगत साउन १५ मा देशभरका जिल्ला सदरमुकाममा गरेको विरोध प्रदर्शनमा उल्लेख्य सहभागिता रहेको भन्दै आन्देलनमा जनसमर्थन प्राप्त भएको कांग्रे्रेसको दावी छ ।
पहिलो चरण अन्र्तगत साउन १५ सम्मको कार्यक्रम सकेपछि आन्दोलनका थप कार्यक्रम घोषणा गर्ने कि नगर्ने भन्ने विषयमा चाँडै पदाधिकारी बैठक बसेर निर्णय गर्ने कांग्रे्रेसले जनाएको छ । यद्यपी तत्काल सडक संघर्षका कार्यक्रम घोषणा नगर्ने कांग्रेसले जनाएको छ ।
कांग्र्रेस प्रवक्ता विश्व प्रकाश शर्माले पहिलो चरणको कार्यक्रम भव्य रुपमा सम्पन्न भएको भन्दै दोस्रो चरणका कार्यक्रम घोषणा गर्ने या नगर्ने भन्ने चाँडै निर्णय गरिने बताएका छन । ‘तत्काल सडकका कार्यक्रम घोषणा हुँदैनन, बैठकपछि निर्णय हुन्छ ’ शर्माले बताएका छन ।
अहिलेसम्मको आन्दोलनको समीक्षा र भावी कार्यक्रमबारे छलफल गरेर निर्णयमा पुग्ने पनि प्रवक्ता शर्माले बताए । मंगलवारको विरोध प्रदर्शनमा सालाखाला देशभर ५ लाख मानिस सडकमा उत्रिएको दावी गर्दै उनले कांग्र्रेसप्रति जनताको साथ रहेको पुष्टि भएको बताएका छन ।
तत्काल सडक आन्दोलन नगर्ने मनस्थिति बनाएको काँग्र्रेसले यसअघि डा.गोविन्द केसीसँग सरकारले गरेको सहमति कार्यन्वयनमा सरकारको व्यवहारिक पक्ष हेर्ने र त्यसै अनुसार संसदमा प्रस्तुत हुने रणनीति बनाएको छ ।
‘डा. केसीसँग गरेको सहमति अनुसार सरकार अघि बढ्छ या बढ्दैन ? केही दिन संसदमा पनि हेर्छौँ । यदि सहमतिको पालना भएन भने संसद अवरोध गर्ने विकल्प हामीसँग रहन्छ’ प्रवक्ता शर्माले भने, ‘संविधानको पालना गर्ने विषयमा पनि कांग्र्रेस उतिकै सचेत भएकाले सभामुख र उपसभामुखको विषयमा पनि कांग्र्रेसले केही दिन पर्ख र हेर को नीति लिने छ ।’
कांग्र्रेसले सत्तापक्षलाई सभामुख र उपसभामुख मध्ये एक छाड्न दवाव दिदै आएको छ । उसले संविधानको पालना गर्न पनि सत्तापक्षले सभामुख र उपसभामुखमा एक पद छाड्नुपर्ने दावी गर्दै आएको छ ।
सभामुख(उपसभामुख र डा.गोविन्द केसीसँगको सम्झौताबारे एक सातासम्म अध्ययन गर्ने तयारीमा रहेको कांग्र्रेस त्यसपछि भने आन्दोलनमा जान सक्छ । काँग्रेसले ‘सरकार नसच्चिए बर्षा, भेल नभनि सडक र सदन दुवैको माध्यमबाट आन्देलनमा होमिने’ दावी गरेको छ ।
‘मध्य बर्षा साउन १५ मा त जनताले यति साथ दिएका छन् भने अव त विस्तारै वर्षायाम पनि सकिन्छ । त्यसपछि हामी दुवै मोर्चाको प्रयोग गर्न पछि पर्दैनौँ । तर, त्यो स्थिति नआओस् भन्ने हाम्रो कामना छ प्रवक्ता शर्माले भने ‘सरकार सच्चिनुपर्यो, संविधानको पालना हुनुपर्यो, जनताका आधारभुत आवाश्यक्ताप्रति सरकार सम्बेदनशील होस् भन्ने हाम्रो माग हो ।’
गत साउन १ गते कांग्र्रेसले ओली नेतृत्वको सरकार अधिनायकबादतर्फ उन्मुख भएको तथा जनबिरोधी काम गरेको भन्दै सरकारलाई खबरदारी गर्न सांकेतिक रुपमा देशब्यापी विरोध प्रदर्शन गर्ने घोषणा गरेको थियो ।
