जन्मसिद्ध नागरिकता प्रकरण हाउस र मन्त्रीपरिषदबाट निर्णय गरी संघीय सरकारलाई पठाउन छौं ः मन्त्री यादव

जनकपुरधाम, १३ साउन । जन्मसिद्ध नागरिकको सन्तानलाई वंशजको नागरिकता दिन आठवटै जिल्लाका प्रमुख जिल्ला अधिकारीहरुलाई दिएको निर्देशन नमानेपछि प्रदेश नं. २ का आन्तरिक मामिला तथा कानून मन्त्री ज्ञानेन्द्र यादवले संघीय सरकारको गृहमन्त्रीलाई पत्र लेखेका छन् ।
मन्त्री यादवले दुई दिनअघि संघीय गृहमन्त्री रामबहादुर थापालाई पत्र लेखेका हुन् । तर पत्रको जवाफ फर्केको छैन ।
मन्त्री यादवले भने, ‘जन्मसिद्ध नागरिकको सन्तानलाई संविधान अनुसार वंशजको नागरिक दिन सहजीकरणका लागि गृहमन्त्रीलाई पत्र लेखेका छौं । गृहमन्त्रीले पनि जिल्ला प्रमुखलाई निर्देशन नदिएमा प्रदेश सभामा यो कुरा राख्ने छौ ।’ प्रदेश सभा र मन्त्री परिषद दुबैबाट निर्णय गरी संघीय सरकारलाई बुझाउने मन्त्री यादवले बताएका छन् ।
संविधानमा जन्मसिद्ध नागरिकको सन्तानलाई वंशजको नागरिकता दिने स्पष्ट उल्लेख भएपनि कार्यान्वयनमा नल्याउनु दुःखद कुरा रहेको मन्त्री यादवले बताएका छन् । उनले संवैधानिक प्रक्रियालाई आफूले कार्यान्वयन गराउन मात्र खोजेको दोहोर्याएका छन् ।