अतिक्रमित पोखरीलाई ३५ दिने सूचना समाप्त, अतिक्रमण मुक्त भएन्

कैलास दास
जनकपुर । बृहत्तर जनकपुर क्षेत्र विकास परिषदको पहल एवं गुठी संस्थान तथा जनकपुर नगरपालिकाको विशेष सक्रियतामा जनकपुरका ऐतिहासिक पोखरीहरुलाई अतिक्रमण मुक्त गर्ने निर्णय भएको महिना दिन भन्दा बढी वितिसकेपनि अहिलेसम्म कार्यान्वयन भएको छैन ।

परिषदका अध्यक्ष रामकुमार शर्माको विशेष पहलमा बैशाख ५ गते भएको बैठकले जनकपुरका महत्वपूर्ण ८ वटा पोखरीहरुको अतिक्रमण मुक्त गराउने निर्णय गरेका थिए । जनकपुरको धार्मिक एवं ऐतिहासिक महत्वको महाराजसागर, कपाल मोचनीसर, दीर्घिकासर, पाप मोचनीसर, लक्ष्मण सर, गोरधोई (पाद प्रक्षालण सर), मण्डन सर (मरहा पोखरी), तैल वृतिका (तेलहा) सर पोखरीको अतिक्रमण बैशाख २६ गतेदेखि हटाउने निर्णय गरेका थिए । तर हालेसम्म सो कार्य कहाँ सम्म पुग्यो के भयो केही अतोपतो छैन ।
गुठी संस्थानले चैत्र २० गते नै ती पोखरीहरुको अतिक्रमण हटाउने गरी सार्वजनिक सूचना गोरखापत्रमा प्रकाशित गरेका थिए । बृहत्तरले अतिक्रमण गरिएको पोखरी खाली गराउने निर्णयलाई निक्कै बढाई चढाई पत्रपत्रिका प्रकाशित गराए पनि हालसम्म कार्यान्वयन गर्न सकेका छैन् । बैठकमा सर्वदली र सर्वपक्षिय व्यक्तिको सहभागी गराएका थिए ।
पोखरीको १५ फिट छाडेर घर बनाउनु पर्ने प्रावधान रहेपनि अहिले पोखरीहरुनै पुरेर घर बनाउने क्रम जारी छ । बृहत्तरको बैठकले अतिक्रमण खाली गराउदा २०४४ सालको नापी सर्वेलाई आधार मानेर गर्ने निर्णय गरेपनि के कति कारणले निर्णयलाई कार्यान्वयन ल्याउन सकेका छैन् केही सार्वजनिक गरेको देखिएन ।
बृहत्तर जनकपुर क्षेत्र विकास परिषदको दक्षिणतिर रहेको महाराजसागरको उत्तरी डिलमा अहिले पनि अतिक्रमण गर्ने क्रम जारी छ । जनकपुरको ऐतिहासिक महत्वका पोखरीहरु अतिक्रमण गराउने निर्णय यसअघि पनि पटक पटक गरिएपनि कार्यान्वयन हुन सकेका छैनन् । कतिपय व्यक्तिहरुले जनकपुरका ऐतिहासिक पोखरीहरुलाई आफनो निजि पोखरी बनाएर विक्री समेत गरेको छ । जनकपुरको पहिचान नै यहाँका मठ मन्दिर र पोखरी भएपनि त्यसको संरक्षणतर्फ सरोकारबाला निकाय गम्भीर रहेको देखिदैन् ।