पाप मोचनी अतिक्रमण घर टहराहरु भत्काइए

कैलास दास
जनकपुर, असार ०४ । जनकपुरको ऐतिहासिक महत्वको धार्मिक तलाउहरुको संरक्षण गर्ने अभियान अन्तर्गत बुधवार पापमोचनी सर अतिक्रमण गरेका घर टहराहरु बुधवार भत्काइएको छ । करीब दुई दर्जन घर एवं टहराहरु भत्काइएको हो ।

पोखरीको उत्तर तीर वनेको पक्की तथा अर्ध पक्की घरहरु भत्काईएको छ । पोखरीको १५ फिट भन्दाभित्र पसेर घरहरु भत्काएकोमा त्यसको विरोध पनि भएको छ । उक्त पोखरीको डिलमा जानकी मन्दिर अधिनस्त ७ कठा भन्दाबढी जग्गा रहेका थिए । ती जग्गाको लालपुर्जा पनि भएको बेलामा जवरजस्ती घर भत्काएकोमा केही व्यक्तिले विरोध गरेको थियो ।
अतिक्रमण गरी बसोबास गर्दै आएका पोखरीको डिल तथा डिल बाहिर रहेका घरहरुका व्यक्तिहरु विचल्लीमा परेका छन् । उनीहरुले यस अघि बृहत्तर जनकपुर क्षेत्र विकास परिषदमा विरोध गरे पनि कुनै सुनुवाई भएको थिएन् । केही वर्ष अगाडी अहिले भत्काईएको ठाउँमा प्रहरीको नगर कार्यालय बन्ने भनेर मध्य क्षेत्रका तत्कालिन डिआईजीले शिलान्यास पनि गरेका थिए ।  
बुहत्तर जनकपुर क्षेत्र विकास परिषद, जनकपुर नगपालिका तथा गुठ्ठी संस्थानको सहयोगमा अतिक्रमण हटाउने कार्य भएको छ । यस अघि जनकपुरधामको महाराजसागर तथा गोडधोई (गिरनारी पोखरी) पोखरीमा रहेको ४ दर्जन घर टहराहरु भत्काउने कार्य भएको छ ।
जनकपुरमा केही अगुवा पत्रकार एवं समाजसेवीको अगुवाईमा गंगा सागर पोखरीको संरक्षणबाट प्रारम्भ भएको पोखरीको संरक्षण अभियानको क्रममा अहिले अतिक्रमण हटाउने कार्य तर्फ उन्मुख भएका छन् । जनकपुरको ईतिहास बोकेको पोखरीहरुको संरक्षण मात्र भई दिए भावी पुस्ताको लागि ठुलो उपलब्धि हुने विश्वास गरिन थालिएको छ ।