मन्त्री निधि भ्रम फैलाएर एडीबी भगाउने षड्यन्त्रमा

कैलास दास
जनकपुर, जेठ ८ । एडिबी परियोजना बचाउ संघर्ष समिति धनुषाले एडिबीलाई असफल बनाउने पक्षका विरुद्धमा संघर्ष समिति जस्तोसुक्कै संघर्ष गर्नुपरे पनि गर्ने जनाएको छ । संघर्ष समितिद्वारा विहिवार पत्रकार सम्मेलनमा सत्ता र सरकारमा पुगेपछि मन्त्री जस्तो गरिमामय पदमा पुगेका विमलेन्द्र निधिबाट ल्याण्डफिल्डलाई डम्पिङ्ग साईट भनेर अभिव्यक्ति दिनु दुर्भाग्यपूर्ण रहेको संघर्ष समितिका संयोजक बजरंग प्रसाद साहले बताए ।

उनले जनकपुरका जनतालाई अपमान गर्ने किसिमको कार्य भए जनता अब नसहने बताउदै ल्याण्डफिल्डका लागि छनौट गरिएका जग्गामा आर्थिक चलखेल भएको पनि बताए । क्रिकेट म्याचमा म्याच फिक्सिङ्ग भए जस्तै ल्याण्ड फिल्ड साईटको जग्गामा म्याच फिक्सिङ्गको खेल भैरहेको बताए । पूर्व नगरप्रमुख समेत रहेका साहले शक्तिको दुरुपयोग गरेर स्थानीय विकास अधिकारी आयोजनाका प्रमुख गंगाप्रसाद यादव सहितका अधिकारीहरुलाई यस अघि अस्विकृत गरेका जग्गाहरुको निरीक्षण गराएर भ्रम सृजना गराउने खेल भएको बताए ।
पत्रकार सम्मेलनमा नेपाली काँग्रेस धनुषाका सचिव संतोष यादवले ल्याण्डफिल्ड साईटका सन्दर्भमा विहिवार विहान भएको पत्रकार सम्मेलन पार्टीका अवधारणा नभई व्यक्तिगत अवधारणा रहेको बताए । उनले काँग्रेसका नेता विमलेन्द्र निधि क्षेत्र नं. ३ का नेता मात्र नभई राष्ट्रका नेता मात्र नभई आफनो शक्तिको दुरुपयोग गर्न नहुने बताए । नेपाली काँग्रेसका जिल्ला कोषाध्यक्ष हरिनारायण साहको पनि सहभागितामा भएको पत्रकार सम्मेलनमा नगर समितिका सदस्य रामअशिष साह, रामनरेश सिंह, क्षेत्र नं. ४ का महाधिवेशन प्रतिनिधि ताहिर नदाफले ल्याण्डफिल्ड साईटको नाममा भईरहेको खेलको विरोध गरे ।
वैज्ञानिक तरिकाले ५० फिट गहिरो पारेर त्यसमा व्यवस्थित किसिमले फोहरको व्यवस्थापनका साथै उक्त क्षेत्रको विकास निर्माण, सौन्दर्यीकरण लगायतका क्षेत्रमा उल्लेखनीय योगदान दिने र सोही ठाउँमा प्रथम गणतान्त्रिक सहिद दुर्गानन्द झाको स्मृतिमा दुर्गानन्द झा उदयानको निर्माण गरिने संघर्ष समितिका संयोजकले जनाकारी गराए ।
फूलगामा ४ का नरेश प्रसाद साहले ल्याण्डफिल्डको विषयमा भ्रामक प्रचार उक्त क्षेत्रमा गराईएको कारणले जनतामा भ्रम सृजना गराउने कार्य नेकाँ सभापति रामसरोज यादवले मन्त्री विमलेन्द्र निधिबाट भएको बताए ।

संघर्ष समितिको एडीबी भगाउ अभियोन हो ः नेकाँ सभापति यादव
जनकपुर । नेपाली काँग्रेस जनकपुर नगर समितिले एडिबी बचाउनको नाउमा चलाईएको अभियान एडिबी बचाउनका लागि नभई भगाउनका लागि भएको जनाएका छन् । नगर समिति द्वारा विहिवार आयोजना गरिएको पत्रकार सम्मेलनमा नगर अध्यक्ष धिरेन्द्रमोहन झाले एडिबीको नाउमा भईरहेको आन्दोलन षडयन्त्र मुलक रहेको बताउदै पूर्व नगरप्रमुृख बजरंग प्रसाद साहले आफनो घर बचाउनका लागि आन्दोलनको नेतृत्व गरेको आरोप लगाए ।

उनले २०५७ सालमा नगरपालिकाको नगरप्रमुख हुँदा जनकपुर नगरपालिकाको सडक सम्बन्धी फरक किसिमको मापदण्ड ल्याएको त्यसको उदाहरण भएको बताउदै बीसौं नगरपरिषदले समान किसिमको मापदण्ड बनाएको बताए । उनले संघर्ष समितिको नाउमा एडिबीको विरुद्धमा भैरहेको षडयन्त्रप्रति शुक्रवार देखि भण्डाफोर अभियान सञ्चालन गर्ने बताए ।
पत्रकार सम्मेलनमा नेपाली काँग्रेसका सभापति रामसरोज यादवले ल्याण्डफिल्ड साईटको निर्माँण ४०(५० वर्षको टारगेटलाई गरेर गर्नुपर्ने र त्यसका लागि फूलगामाको जग्गा उपयुक्त नभएको र यसको विकल्पमा वैकल्पिक जग्गाहरुको खोजी हुन थालेको दावी गरे । उनले फरुलगामाका जग्गामा केवल माटो परिक्षणको काम मात्र भएको र अन्य जग्गा लिदा ३ महिना ढिलाई मात्र हुने र यसले एडिबीमा कुनै प्रभाव नपर्ने दावी गरे ।
पत्रकार सम्मेलनमा विश्विद्यालयको नाममा विगतमा जनकपुरमा आएको पशुपद्यशालाको रकम फिर्ता भएको सन्दर्भमा गरिएको जिज्ञासामा पत्रकार सम्मेलनका आयोजकहरु निरुत्तर भएका थिए । अधिकांश पत्रकारहरुले एडिबीका सन्दर्भमा काँग्रेसका वरिष्ठ नेता एवं मन्त्री विमलेन्द्र निधिबाट आएको अभिव्यक्तिप्रति आपत्ति जनाएका थिए । पत्रकारहरुले कुनै पनि हालतमा जनकपुरको विकासका लागि कायापलट गर्ने एडिबीमा अवरोध हुन नहुने भनेर आयोजकलाई नै सचेत गराएका थिए ।

आयोजनाको ध्यानाकर्षण
जनकपुर । एशियाली विकास बैंको ऋण तथा आर्थिक सहयोगमा जनकपुरको कायापलट हुने गरि संचालन हुन लागेको आयोजना सम्बन्धमा केही दिन यता विभिन्न संचार माध्यममा आएको समाचारप्रति आयोजनाको ध्यानाकर्षण भएको आयोजना व्यवस्थापक गंगा प्रसाद यादवले जनाएका छन ।
यादवले विहिवार प्रेस विज्ञप्ति जारी गरि परियोजनाको कामहरु द्रुत गतिमा अघि बढिरहेको अवस्थामा धनुषाको फुलगामा निर्धारण गरिएको लैण्डफिल साइटको माटो परीक्षण सम्पन्न भई सर्वे डिजाइन समेत अन्तिम चरणमा रहेको बेला उक्त जग्गा राजर्षि जनक विश्वविद्यालयको लागि प्रस्तावित हो भनि आएको अभिव्यक्ति र साइट सर्वे कार्यमा भएको अवरोध बाट आयोजनाको कार्यमा केही अवरोध उत्पन भएको महशुस भएको जनाएका छन ।
आयोजनाको लागी जनकपुरवासीबाट प्रदर्शित चासो र चिन्ता प्रति आयोजनाले आभार प्रकट गर्दै आयोजनाको कार्यहरु संचालनमा नै रहेको र आयोजनाको अन्त नभएको समेत विज्ञप्तिमा उल्लेख गरिएको छ । जनकपुर भरीको २६ कि.मी. सडक र सोही दुरीमा ढल तथा व्यवस्थित ल्याण्डफिल साईटको निर्माण गर्न जानकी मन्दिरलाई केन्द्रविन्दु मानी त्यहाँबाट विस्तारित र अन्य ढल सहितको सडक संजाल र फोहोरलाई उचित तथा बैज्ञानिक तवरले व्यवस्थापन गरिने उद्देश्य बोकेको आयोजनाको ढल सहितको सडक संजालको डिजाईन कार्य अन्तिम चरणमा रहेको समेत अयोजनाले जनाएको छ ।