विजया दशमीको जनकपुरमा भव्य तयारी

जनकपुर । हिन्दुहरुको महान पर्व विजयादशमीको जनकपुरमा भव्य रुपमा तयारी भई रहेको छ । तराई÷मधेशका जिल्ला मध्ये धनुषा जिल्लामा विजया दशमी सबभन्दा बढी हर्षोल्लास एवं भव्यता पूर्वक मनाउँदै आएपनि यसवर्ष अझै भव्यता दिने यहाँका युवा क्लवहरुले अगाडि आएका छन् ।
रामानन्द युवा क्लवले रामानन्द चौकमा भव्यता पूर्वक दूर्गा पूजाको तयारीमा लागेका छन्। एक महिना अगाडिदेखि नै बासको पण्डाल निर्माणमा जुटेका छन् । प्रत्येक वर्ष त्यहाँ माटोको प्रतिमा बनाएर दूर्गा पूजा मनाउँदै आएको छ ।

त्यस्तै विजया दशमीको आकर्षक केन्द्रको रुपमा रहेको यहाँ मठ मन्दिर तथा शक्तिपीठहरुमा पनि निक्कै सजावटको तयारी भई रहेको छ । विशेष गरी राजदेवी मन्दिरमा विजया दशमीलाई मध्यनजर गरी पार्किङ्गको समेत डेकोरेशन भई रहेको छ । त्यस्तै पाण्डल गेटको एक महिना अगाडिदेखि निर्माण कार्य हुन लागेको छ ।यसवर्ष तराई÷मधेश तथा सीमावर्ती क्षेत्रका लागि विजया दशमीमा जनकपुरमा माता वैष्णोदेवीको गुफा सबैलाई आकर्षित गरिने जनाइएको छ । महावीर युवा कमिटीको पहलमा भारतमा वैष्णेदेवी मन्दिर जस्तै यहाँ माता वैष्णो देवीको गुफा निर्माण भई रहेको जनाइएको छ । करीब २० लाखभन्दा बढी खर्च गरेर सो निर्माण हुन लागेको बताइएको छ । कमिटीका अध्यक्ष धर्मेन्द्र कुमार साहले यस वर्ष राजदेवी मन्दिर बाहेक यहाँका वैष्णोदेवी गुफा मुख्य आकर्षकको केन्द्र हुने दावी गरेका छन् । जनकपुरको शक्तिपीठ मठ मन्दिरमा दर्शन पश्चात् माता वैष्णोदेवीको गुफा दर्शन गर्ने दर्शकहरुको घुइचो लाग्ने विश्वास व्यक्त गरेका छन् । अध्यक्ष साहले यहाँका विजया दशमी सबभन्दा ठूलो र आकर्षक भएपनि अन्य वर्ष प्रचारप्रसारमा कमी देखिएको थियो । तर यसवर्ष नेपाल भारतको विभिन्न जिल्लामा १५ दिन अगाबैदेखि प्रचार प्रसार गरिने कार्यक्रम रहेको जनाइएको छ । उनले विभिन्न मिडिया तथा पर्चा पम्पलेटमार्फत जनकपुरको विजया दशमी को प्रचार प्रसार गरिने सोच रहेको थपेका छन् ।
त्यस्तै विद्यापति चौकमा रहेको स्थापित दूर्गा मन्दिरको पण्डल समेत आकर्षक किसिमले निर्माण भई रहेको छ । यसवर्ष जनकपुर प्रवेश द्वारको निर्माण समेत गरिने युवाहरुको सोच रहेको जनाइएको छ ।