सडक हिलाम्य बनेपछि जनकपुरबाट टाढिदै सर्वसाधारणहरु

जनकपुर । वर्षायाममा ग्रामीण भेगका जनता जनकपुर सहरबाट टाढिदै गएको छ । धनुषाको दर्जनौ गाउँका सर्वसाधारणहरु उपभोग्यवस्तुका किनबेचका लागि जनकपुरमा निर्भर भएपनि वषार्याममा सडक अवरुद्ध भएपछि समस्या खेप्नु परेकोछ । करीब एक महिना अघिदेखि नै ग्रामीण भेगमा चल्ने सवारी बस लगायतका साधनहरु बन्द रहेका छन् भने आईतवारदेखि परेको पानीले सानासाना सवारी साधन समेत चल्न पाएको छैन ।

परेको पानीले विशेष गरी कच्ची सडक हिलाम्य तथा सडकमै पानी जमेपछि यातायात अवरुद्ध भएको छ । यातायात अवरुद्ध हुँदा धनुषाको लवटोली, चक्कर, दुहवी, लखौरी, रघुनाथपुर, सबैला, एकराही, तिनकौरीया लगायत दर्जनौं गाउँका सर्वसाधारणहरु प्रभावित भएका छन् । सडकमा डेढदेखि दुई फिटसम्म खल्डो परेको छ । सडकमा खल्डो पर्दा साइकल, मोटरसाइकल तथा चारपाग्रे गाडी समेत आउने जानमा समस्या देखिएको छ ।
नेपाल सद्भावना पार्टीका केन्द्रिय महासचिव राजीव झाले गाविस सचिवहरु मार्फत विकास कार्य गर्न लगाएपनि गाविस सचिवहरु इमान्दार हुन नसक्दा यस्तो समस्या भोग्नु परेको बताए । उनले धनुषा जिल्ला विकासको नाउँमा सबभन्दा पछाडि परेको आरोप लगाए । विकासका लागि आएको बजेट मध्ये ५० प्रतिशतभन्दा बढी रकम फ्रिज भएको गएको छ । तर धनुषाको सडकहरुको दुर्दशा हेर्ने हो भन्ने सबभन्दा बढी बेत्तर रहेको उनको ठहर रहेको छ ।
उनले धनुषाको विकासमा कर्मचारी मात्र होइन, राजनीतिक दल समेत दोषी रहेको स्वीकार्दै  विकासको नाउँमा राजनीतिकरण गर्न नमिल्ने बताए । मुलुकमा राजनीतिकर्मी तथा प्रशासन इमान्दार भएमा विकास सम्भव रहेको बताए । जनकपुरबाट जोडिने जनकपुर भिठामोड, जनकपुर जटही, जनकपुर यदुकोहा, जनकपुर सबैला लगायतका सडकहरुको अवस्था दयनीय रहेको छ । यातायात व्यवसायीहरुले सडक निर्माणको माँग गर्दै यातायात सञ्चालन बन्द गरेपनि राज्यले अहिलेसम्म कानमा तेल हालेर सुतेका छन् ।