धनुषामा एकै परिवारका चारजनामाथि हतियार प्रहार

जनकपुर, भदौ २३ । धनुषाको यदुकोहामा एकै परिवारका चारजनामाथि धारिलो हातियार प्रहार गरी लुटपाट भएको छ । जिल्लाको पूर्वी भेग यदुकोहा ४ बस्ने रामओधी दास तत्माको घरमा आक्रमण गरी बुधबार राति डकैती भएको प्रहरीले जनाएको छ ।

प्रहरीका अनुसार राति करिब १ बजे अधादर्जनभन्दा बढीको संख्यामा आएका डाँकाहरुको समुहले घरमुली आयोधी दास तत्मा, उहाँकी ५० वर्षकी श्रीमती फुलकुमारी  देवी , छोरी १७ वर्षकी प्रमिला र ८ वर्षकी रिंकुलाई धारिलो हतियार प्रहार गरी घाईते बनाएका छन् । उनीहरुलाई टाउको तथा शरीरको विभिन्न भागमा डकाहरुले धारिलो हतियार प्रहार गरेको हो । घाईते चारै जनाको उपचार जनकपुर अञ्चल अस्पतालमा भइरहेको छ ।
पिडीत परिवारका अनुसार डाकाहरुले नगद एक लाख रुपैँया र ५० हजार मूल्यबराबरको सुनचाँदीको गरगहना गरी डेढलाख भन्दा बढीको धनमाल लुटेर लगेका छन् । घटना सन्दर्भमा थप अनुसन्धान भइरहेको ईलाका प्रहरी कार्यालय यदुकोहाले जनाएको छ ।