एडिबीको कार्यमा तिव्रता आएपनि ल्याण्डफिल साइड अन्योलमा

कैलास दास
जनकपुर । एशियाली विकास बैंक (एडिबी)को ऋण सहयोगमा जनकपुरको मुहार फेरिने किसिमले बन्न लागेको नाला तथा सडकहरुको कार्य तिव्रगति आएपनि सोको लागि चाहिने ल्याण्डफिल साइडका लागि जग्गा छनौट अन्योलमा नै छ ।

जनकपुर उपमहानगरपालिकाका ईन्जिनियर वीरेन्द्र यादवका अनुसार ल्याण्डफिलका लागि जग्गा दिनका लागि गुठी संस्थान शाखा कार्यालय जनकपुर तथा केन्द्रिय कार्यालय काठमाडौंमा पत्र पठाई सकेको छ । तर कहिलेसम्म सोको जवाफ आउला भन्न सकेन । एडिबी परियोजना सञ्चालनका लागि सबभन्दा पहिला र महत्वपूर्ण मानिने ल्याण्डफिल साइड भएपनि अहिलेसम्म त्यसका लागि जग्गा उपलब्ध हुन सकेको छैन । हुनतः पहिलो चरणमा नालाको निर्माण कार्य शुरु भएको छ भने अर्को चरणमा सडक निर्माण कार्य शुरु हुने छ ।
एडिबी परियोजना ठेक्का सम्झौता अनुसार मंसिरसम्मा ४ किलोमिटरभन्दा बढी नालाको कार्य सम्पन्न हुनुपर्ने छ । सोही अन्तरगत वैज्ञानिक किसिमले सडकको बीचोबीच नाला निर्माणका लागि ह्युमपाइप बिछ्याउने कार्य शुरु भएको देखिन्छ ।

उपमहानगरपालिकाभित्रमा ३० किलोमिटर नाला निर्माण गरिने कार्य रहेको छ । नगरको विभिन्न ठाउँबाट शुरु भएको ह्युम पाइप बिछाउने कार्यलाई तिव्रता दिएको छ । वर्षायाममा सुस्तगतिमा सो कार्य भएपनि अहिले तिव्रता दिएको छ । हिन्दुहरुको महान् चाँड विजया दशमीपछि सो कार्य तिव्रताका साथ हुने निर्माण ठेक्का लिएका रमण कन्स्टूक्सन बताउँछन् । दुई वर्ष भित्रमा नाला तथा सडक निर्माण कार्य गरिने छ ।
एशियाली विकास बैंकले जनकपुरको नाला तथा सडक निर्माणका लागि एक अर्ब ९० करोड रुपैया आर्थिक सहयोग दिएको छ । त्यसमध्ये ३० किलोमिटर नाला निर्माण तथा १० किलोमिटर सडक निर्माण गरिने छ । एडिबी परियोजना अन्तर्गत ल्याण्डफिल साइड विवाद कायम नै छ । सेप्टेम्बरसम्म ल्याण्डफिलका जग्गा उपलब्ध गराउने एडिबीको रहेको थियो । तर अहिलेसम्म सो जग्गा उपलब्ध हुन सकेको छैन ।
जनकपुर उपमहानगरपालिकाका इन्जिनियर वीरेन्द्र यादवका अनुसार हिन्दुहरुको पर्वका कारण जग्गा खरीद गर्नमा समस्या आएको छ । तर अब छिट्टै ल्याण्डफिलका लागि जग्गा उपलब्ध हु्ने दावी गरेका छन् ।