विवाद रहित ल्याण्डफिल छनौट गरी एडिबी आयोजना सञ्चालन गर्नुपर्छ ः संघर्ष समिति

कैलास दास
जनकपुर, भदौ १३ । एशियन डेभलेपमेन्ट बैंकले एकीकृत सहरी विकास आयोजना अन्तर्गत जनकपुर विकासका लागि ऋण सहयोग वापत दिएको एक अर्ब ९० करोड रुपैया ल्याण्डफिल साइट विवादरहित पारी सञ्चालन गर्नका लागि सर्वदलीय सर्वपक्षीय संघर्ष समितिले माँग गरेको छ ।
संघर्ष समितिद्वारा जनकपुर नगरपालिकामा शुक्रवार आयोजित पत्रकार भेटघाट कार्यक्रममा उपस्थित राजनीति दलका प्रतिनिधिहरुले एडीबीमा उल्लेखित मापदण्डको आधारमा ल्याण्डफिल साइट छनौट गरी कार्य अगाडि बढाउनका लागि आग्रह गरेका छन् । एडिबी बचाउ संघर्ष समितिका अध्यक्ष एवं पूर्व नगर प्रमुख बजरंग प्रसाद साहको अध्यक्षतामा भएको सो कार्यक्रममा उपस्थित राजनीतिककर्मीहरुले हरेक किसिमले ल्याण्डफिल साइटका लागि धनुषाको फुलगामा नै उपयुक्त रहेको भन्दै विज्ञहरुको रिपोर्टको आधारमा पनि त्यही हुनुपर्ने जिकिर गरे । उनीहरुले प्रस्तावित ठाउँमा ल्याण्डफिल साइट भएन भने कडा आन्दोलनको चेतावनी पनि दिए ।
संघर्ष समितिले कुनै व्यक्तिको दवावमा फुलगामामा प्रस्तावित ल्याण्डफिललाई छाडेर बेंगाशिवपुरको ५२ विघामा बनाउन लागेको भन्दै त्यो ठाउँ प्राविधिक तथा विज्ञहरुको भनाई अनुसार पनि उपर्युक्त नरहेको बताए । त्यहाँको माटो परीक्षणमा र कम्तीमा सहरभन्दा  ७ किलोमिटर दूरी हुनुपर्ने त्यो पनि नरहेकोले फुलगामामा नै सबैखाले ल्याण्डफिल साइटका लागि उपयुक्त रहेको बताए । अर्को कुरा फुलगामाको माटो परीक्षण लगायतका कार्यमा दुईवर्ष वितिसकेको छ । आयोजना सञ्चालनका लागि ल्याण्डफिलका अधिकांश कार्य भएको बेलामा अवरोध कायम गर्नु उचित नरहेको भन्दै शिवपुरको ५२ विघा प्राविधिद्वारा जाँचमा पनि नठहरिएको उल्लेख गरे । २२ दल सम्मिलित राजनीतिक सर्वदलीय सर्वपक्षीय संघर्ष समितिका श्रीप्रसाद साह, रामचन्द्र मण्डल, अरविन्द साह, कौशल किशोर, रामनरेश साह, संजय चौधरी, हरिनारायण साह, महाशंकर ठाकुर, श्रीराम साह, झल्कु यादव सहितका वक्ताहरुले बोलका थिए ।
उनीहरुले विवाद रहित ल्याण्डफिल साइट छनौट गरी एडिबी आयोजना सञ्चालन नगरे भने  १५ गते रेल्वे स्टेशनबाट मशाल जुलुस, १६ गते जनकपुर बन्द तथा २० जनप्रदर्शन तथा आमसभा गरिने बताएका छन् । कार्यक्रमको उद्घोषण श्रीनारायण साहले गरेका थिए ।
यसैबीच सर्वपक्षीय सर्वदलीय संघर्ष समितिका सदस्य रहेका मधेशी जनअधिकार फोरम नेपाल धनुषाका अध्यक्ष शेषनारायण यादवले एडीबी आयोजनाले जनकपुरको कायापलट सहितको विकास हुने भएको कारण यसमा सम्पूर्ण राजनीतिक दल स्थानीयवासीको सहयोगको आवश्यकता रहेको बताएका छन् ।
उनले एडीबी आयोजना कुनै व्यक्ति विशेषका लागि नभई जनकपुरको विकाससंग सम्बन्धित रहेको कारण फोरम नेपालले एडीबी बचाउ सम्बन्धी हरेक आन्दोलनमा सहयोग गर्दै आएको र आगामी दिनमा सहयोग गर्ने प्रतिबद्धता समेत जनाएका छन् ।
अध्यक्ष यादवले व्यक्तिगत वा राजनीतिक स्वार्थले कसैले पनि एडीबी आयोजनामा अवरोध गर्नु गलत रहेको र एडीबी आयोजना फिर्ता जानु जनकपुरका विकासका लागि दुर्भाग्य हुने भएको कारण ल्याण्डफिल साइट विवाद अन्त्य गरी यस आयोजनालाई तत्काल कार्यान्वयन गर्न सम्बन्धित निकायसंग मांग समेत गरेका छन् ।